Maya and Aztec

Ancient Mesoamerican civilizations






Rabinal-Achi. U NABE BANBAL. Editor: Étienne-Charles Brasseur de Bourbourg

Category: Books, Rabinal-Achi

RABINAL-ACHI
VEPU
XAHOH-TUN.


U NABE BANBAL.


U NABEMUL CA CHAU
QUECHE-ACHI.

C’at el uloc, vorom ahau, cakom ahau! Cuxere chi nabe vae mavi ca nu qizo u chayic u vixal, u cutamil ahau Chacachib, Zamanib, Cauk Rabinal!… Ca cha curi nu tzih chuvach cah, chuvach uleu. Quehe mavi quïa tzih qu’in chau uq La. Cah, uleu chi qohe uq La, o Galel-Achi Rabinal-Achi!

U NABEMUL CA CHAU
RABINAL-ACHI.

Yeha! oyeu achi, Cavek-Queche-Vinak! La ca cha ri a tzih chuvach cah, chuvach uleu? «C’at el uloc, vorom ahau, cakom ahau! Cuxere chi nabe vae mavi ca nu qizo u chayic u vixal u cutamil ahau Chacachib, Zamanib, Cauk Rabinal?» … La ca cha ri a tzih?… Qui-ta-vi-ba cah, qui-ta-vi-ba uleu! mi-x-c’at yauic chupam r’al nu chab, chupam r’al nu pocob, ruq nu yaquim vit, nu yaquim v’icah, ruq nu chincu, nu galgab, nu zahcab, nu zalmet, ruq nu couil, v’achihilal. Quehe ta-chi-na, ma-ta-chi-na, ta mi-x-cat in tzakamah chirech nu zaki caam, nu zaki colo. Ca cha curi nu tzih chuvach chi cah, chuvach uleu. Cah, uleu ta chi qohe avuq, oyeu achi, canab, teleche vinak!

U CAMUL CA CHAU
RABINAL-ACHI.

Yeha! oyeu achi, canab, teleche vinak! Laki qamo chire chi cah, chirech uleu! Qui mi-x-at u ya cah, mi-x-at u ya uleu, ta mi-x-at tzak cut chupam r’al nu chab, chupam r’al nu pocob, ruq nu yaquim vit, nu yaquim icah, nu chincu, nu galgab, nu zahcab, nu zalmet…. C’at cha, ta-cut, aviri a huyubal, aviri a tagahal? aviri a bozinak-vi tzala huyub, tzala tagah? ma-at-on r’al zutz, ma-at-on r’al mayul, ma-at-on okotahinak uloc chuvach chay, chuvach labal?… ca cha curi nu tzih chuvach cah, chuvach uleu. Quehe mavi quïa tzih koh tzihon avuq. Cah, uleu, chi qohe avuq, canab, teleche vinak!

U CAMUL CA CHAU
QUECHE-ACHI.

Eha! ahcarroc cah, ahcarroc uleu! Qui, pa tzih ca biih La? togobvachinak u vach tzih chi bixtah La chuvach cah, chuvach uleu, chi nu chi, chi nu vach. «In oyeu, in achi, ca cha curi tzih La. La apare at anomahinak-vi uloc chuvach chay, chuvach labal? ca cha ri tzih La.» La! in qo oyeu, la! in qo achi, xatalari alavi in anomahinak uloc chuvach chay, chuvach labal! Xavi ca cha na-curi tzih La: «Ch’a hiquiba na u vach a huyubal, a tagahal, ca cha ri tzih La.» La! in qo oyeu, la! in qo achi! curi-ta x-ch’in hiquiba tacut u vach nu huyubal, nu tagahal! Mana calah in bozinak-vi tzala huyu, tzala tagah, xa in r’al zutz, xa in r’al mayul? Hulacha x-ch’in hiquiba nu huyubal, nu tagahal! ca-rah xa x-ch’iqo can cah, x-ch’iqo can uleu! Ca cha curi nu tzih chuvach cah, chuvach uleu. Quehe mavi quïa tzih koh tzihoyah uq La, ô Galel-Achi Rabinal-Achi. Cah, uleu chi qohe uq La!

R’OXMUL CA CHAU
RABINAL-ACHI.

Yeha! oyeu achi, canab, teleche vinak! La ca cha na curi a tzih chuvach cah, chuvach uleu: «La! in qo oyeu, la in qo achi, curi ve x-ch’in hiquiba nu huyubal, nu tagahal. Mana calah in bozinak-vi tzala huyu, tzala tagah, xa in r’al zutz, xa in r’al mayul?» Ma-pa ca cha ri a tzih? Ve-ba mavi x-ch’a hiquiba u vach ri a huyubal, u vach ri a tagahal, ta ca-rah cah, ta ca-rah uleu, xa at vahim, xa at perahim, cat nu v’oquetizah chuvach v’ahaual, chuvach nu vinakil, chupam nu nimal tzak, chupam nu nimal qoxtun. Ca cha curi nu tzih chuvach cah, chuvach uleu. Quehe, cah, uleu chi qohe avuq, canab, teleche vinak!

R’OXMUL CA CHAU
QUECHE-ACHI.

Ahcarroc cah, ahcarroc uleu! La ca cha curi tzih La chuvach cah, chuvach uleu. «Alata-cu qo-vi ri x-chi r’oquibeh, ri x-chi r’elebeh ri tzih, ri u chalinic ri mi-x-koh tzihoyah uq La chuvach cah, chuvach uleu. Are-ba chi r’elebeh, are x-ch’u kahibeh, rumal x-ch’a hiquiba, x-ch’a calahizah u vach a huyubal, u vach a tagahal: ve mavi x-ch’a calahizah, ta ca-rah cah, ta ca-rah uleu, xa at vahim, xa at perahim x-cat nu coh-ul chuvach v’ahaual, nu vinakil.» Ca cha curi tzih La chuvach cah, chuvach uleu. Caroh! at, cah, caroh! at, uleu! Ri bala x-ch’in hiquiba cut u vach nu huyubal, u vach nu tagahal? ri, yx, tapichol-on, tziquin? In r’oyeualal, in r’achihilal ri ahau ri Yaqui Cunen, ri Yaqui Chahul. La, ahau Balam-Achi, Balam-Queche qui lahucutah kabinak-vi r’akanibal zutz, mayul, chi nu huyubal, chi nu tagahal. Alata cu qo-vi chu kahibeh, alata cu qo-vi ri x-chi r’elebeh va tzih, va u chalinic ri mi-x-oh tzihon uq La chuvach cah, chuvach uleu. Quehe cah, uleu chi qohe uq La, o Galel-Achi, Rabinal-Achi!

U CAHMUL CA CHAU
RABINAL-ACHI.

Oyeu achi, Cavek Queche-Vinak! xa-pe xa Lal ri ca nu too, xa-pe xa Lal v’atz, xa-pe xa Lal nu chag? Catza-na-pu x-zach nu qux ri chirech ilic La, chirech tzuvic La chirih u nimal tzak, chirih u nimal qoxtun! Lal bari ca ban La r’ogibal utïu, ca ban La r’ogibal yac, ca ban La r’ogibal-utuy, balam, chirih u nimal tzak qoxtun, ca boyibeh La ke la zakil al qahol, ri e qu’elezam chuvach u nimal tzak, chuvach u nimal qoxtun, e tzukuy re u chicopil gana-cab, raxa-cab, tzukubal rech v’ahaual, nu vinakil, mama Ahau Hobtoh. Xacuxere, la hulacha u yaqueic u zilobizaxic va oyeual, achihilal ta mi-x-yac ch’ulo La. Ma-pa xoh qui ziqih, xoh qui chocob e cablahuh chi ahauab, e r’ahaual huhun chi tzak, huhun chi qoxtun?…

… Ma-pa x-cha ri quitzih chike. «Chi pet-an Alak, alah, cablahuh chi oyeu alah, cablahuh chi achihab ch’ul-ta ta nala pixabaxiquil Alak. Rumal x-haaric, x-taamic, x-tuxaric, tzarahmakiric u pam huhun chi vaibal, chi oqobal: xa lol xa xil chic, que xililic chi canoc chupam qui tzakil, qui quxtunal ri zakil al, zakil qahol: rumal xa beleheb, xa lahuh chic chi quiric chic qui tzakil, qui qoxtunal. Quehecut chi ka tanaba-tah u tiic ri zakil al, zakil qahol; areta-cu chi ka qam u tiih laka-chuca, nima-quinag, laka-ixtapacal, laka-cakix-coru-vach, laka-tzuleyuhi.» Ma-pa mi-x-cha re ca pixabaxiquil kumal e c’ahauab, e rahaual? Nakipe mavi ch’iqouic r’ahabal qux La chirech va oyeual, va achihilal? Mapa Beleh-Mokoh, Beleh-Chumay x-bec u mukic, u pizic va oyeualal, va achihilal kumal c’ahaual chila Chi-Qotom, Chi-Tikiram, ch’ucheexic? Are-na-cu ca toho ri zanah La, ri varal chuxmut cah, chuxmut uleu. Quehecu mi-x-pixab-ta can La chi huyubal La, chi tagahal La; rumal varal ca ka chay vixal La, cutamil La, varal chuxmut cah, chuxmut uleu! Mavi c’ulo chi gih, chi agab chi kah ta ch’opon e’La chi huyubal La, chi tagahal La: catz cu varal Lal camel, Lal zachel varal chuxmut cah, chuxmut uleu. Quehe cu nu yopizah tzihol La chuvach v’ahaual, chuvach nu vinakil chupam u nimal tzak, u nimal qoxtun. Ca cha curi nu tzih chuvach cah, chuvach uleu. Quehe mavi quïa tzih koh tzihonic. Cah, uleu chi qohe uq La, Cavek-Queché? Vinak!

U CAHMUL CA CHAU
QUECHE-ACHI.

Yeha! oyeu achi, o Galel-Achi, Rabinal-Achi! La ca cha na curi tzih La chuvach cah, chuvach uleu: «La hulacha u yaquic ri oyeual, achihilal, ca cha ri tzih La.» He, zuculic, x-e pixab chi nabe k’ahaual, ka vinakil; Xacuxere mana qo-vi chirech v’ulic nu petic chi nu huyubal, chi nu tagahal. Chiri mi-x-el-vi hun takon zamahel chuxmut cah, chuxmut uleu, chuvach ahauarinak tzak Cakyug-Zilic-Cakocaonic-Tepecanic u bi, u chi, u vach la tzak, la qoxtun. Ma-pa ca yutut apan-oc lahuqal pek, oqal cacou x-ul apan-oc chuvach v’ahaual, nu vinakil, Balam-Ahau, Balam-Achi, Balam-Queche, u bi u chi, u vach la nu tzak, la nu qoxtun….

… Tazec ch’u ta apan-oc ri ahau Balam-Ahau, Balam-Queche, rumal tazec ca rayix u camic ri ahau Chacachib Zamanib, Cauk Rabinal chuvach Uxab, chuvach Pokomam. «Chi ka ban-ta utzil chaomal ch’u tak-ta v’iloc r’oyeual r’achihilal ri ahau Queche huyu, Queche tagah, ch’ul echabe-na-tah ri zakil huyu, ri zakil tagah; chi pe-ta-cut ri nu chag, ri nu nimal, ch’ul echabe-na-ta-cut varal chuxmut cah, chuxmut uleu, chirech zakil huyu, chirech zakil tagah, ch’ul tico-na-tah, ch’ul avexa-na-tah, xa tak ulan chi bec u tzam ka qum, u tzam ka zakil qum, ka zakil nay.» Quehecut x-cha cu u yebal u ziqibal La takon chuvach v’ahaual….

… Quehe-cut mi-x-u tzak apanoc u yebal, u ziqibal v’ahaual, nu vinakil: «Yeha, yeha! v’oyeualal, v’achihilal! Chi oh-at tohel, c’at tzeleba uloc; rumal xi-v’ulaah hun takon zamahel x-pe chuxmut cah, chuxmut uleu: chi yaca uloc a couil, av’achihilal, r’al a chab, r’al a pocob; ch’a tzala uloc r’akan huyu, r’akan tagah!»

X-cha apanoc u yebal, u ziqibal v’ahaual, nu vinakil: in hin-tan-tah; in qu’in tahinic in qohol r’etalil uleu chu benebal gih, chi r’oquibal agab, chi machmal teu, machmal horon, chila Pan-Tzahaxak ch’ucheexic. Quehecut mi-x-in yac uloc r’al nu chab, r’al nu pocob, mi-x-in tzalah c’uloc r’akan huyu, r’akan tagah, chiricut x-ul nu tzak-vi nabe nu yebal, nu ziqibal chuvach Cholochic-Huyu, Cholochic-Chah, ch’ucheexic … X-i pe chi-cu chila, xavi chiri chic x-ul nu tzak-vi u camul nu yebal, nu ziqibal, chiri Chi-Nim-Che Paraveno chi Cabrakan, ch’ucheexic. X-i pe chi-cu-chila, xavi chiri chic x-ul nu tzak-vi u roxmul nu yebal, nu ziqibal chiri Panchalib, ch’ucheexic. X-i pe chi-cu chila chiri chic x-ul nu tzak-vi u cahmul nu yebal, nu ziqibal Xol-Chacah, ch’ucheexic … Chiri x-in ta-vi ca tahin u cok lotzo tun, lotzo gohom cumal cablahuh u ganal Cot, Balam … Taze-nim ca lanau cah, ca lanau uleuh quimaih que chahahic, quimaih que vahahic la cablahuh u ganal Cot, u ganal Balam cuq achih-mun, ixok-mun….

… Chiricut mi-x-nu bix-tah chuvach cah, chuvach uleu. X-cha curi nu tzih chuvach cah, chuvach uleu: «C’at el uloc, vorom ahau, cakom ahau, xere chi nabe va mana can’qizo u chayic u vixal u cutamil La, ahau Chacachib, Zamanib, Cauk Rabinal.» X-cha curi nu tzih. La qo cu ch’u ban ri chirech La, Lal ahau, mana qo x-in mayih, mana qo xi-nu tih, xare u chabal tzih x-u bixtah chuvach cah, chuvach uleu, o Galel-Achi Rabinal-Achi. Chi chau-ta chi cu La humul chic. Quehe cah, uleu chi qohe uq La, o Galel Rabinal-Achi!

U ROOMUL CA CHAU
RABINAL-ACHI.

Eha! oyeu achi, Cavek-Queche-Vinak! La ca cha na curi a tzih chuvach cah, chuvach uleu? Quitzih are tzih ri mi-x-bixtah La, mana qo x-u hal tzih mi-x-bixtah La. «Chi quitzih varal x-ei-vi hun takon zamahel, chi quitzih oh mi-x-oh takanic chila Queche huyu, Queche tagah.» Xacuxere mana mak, mana itzel ri x-oh takan-vi, que ch’u ta apan-oc la Ahau Balam, Ahau Balam-Queche, taze ca raih u camic, u zachic la Ahau Chacachib Zamanib, Cauk Rabinal cumal e Ah-Uxab, Ah-Pokomam, varal chuxmut cah, chuxmut uleu. «Chi ka ban-ta utzil chaomal, ch’u tak-ta uloc ri Ahau Queche huyu, Queche tagah, ri r’oyeual, r’achihilal, ch’ul echabe-na-tah chirech zakil huyu, zakil tagah, ch’ul tico-na-tah, ch’ul auexa-na-tah. Xavi ta koh ticonahic, koh auexanic xatak ulan chi bec u tzam ka qum, u tzam ka zakil qum, zakil nae.» Cha nabe ri ka tzih chuvach cah, chuvach uleu. Xacuxere rumal xalog x-oh qulelebeh La, xalog x-oh hulkahibeh La, varal chuxmut cah, chuxmut uleu….

«Qamou chirech cah, qamo chirech uleu mi-x-yopitah ulo La chuvach ka tzakil, ka qoxtunal; xacuxere rumal chi ka yac cha, chi ka yac labal, x-que ka labaleh e Ah-Uxab, e Ah-Pokomam; xacuxere x-ch’in ya ekomal La, takiquilal La; chila ta-bala ch’an-vi La chuvach Nim-be, chi r’uqaba ya tziquin, chuvach Cholochic-Zakchun, ch’ucheexic…. Ma-ta cu chi ya La r’ahabal qui qux e Ah-Uxab, e Ah-Pokomam. Ma yutzcopihe-vi La chi qui huyubal, chi qui tagahal, que mayih-ta-cu La, que u tih-ta-cu La, varal chuxmut cah, chuxmut uleu.» X-cha nabe re ri nu tzih. Xacuxere rumal mana qo x-u chak La qui ilic, qui tzuic e Ah-Uxab, e Ah-Pokomam; rumal x-qui tzolcomih quib chi uxil, chi amoloil, chi zanical, chi chequenal, xa nim que lememic, que chololic quimah r’akan huyu Equempek-Ganahal, ch’ucheexic. Xacutare mi-x-nu tzak apan-oc nu tzubal, nu mucubal chuvach cah, chuvach uleu; xaqate ri mi-xi-nu v’ilo e Ah-Uxab, e Ah-Pokomam chiricut mi-x-pah nu qux, mi-x-zocotah nu qux chirih ilic La, tzuvic La, rumal ya bila r’ahabal qui qux e Ah-Uxab, e Ah-Pokomam. Chiricut mi-x-in tzak apan-oc nu yebal, nu ziqibal chirech La: «Yeha, Yeha! oyeu achi, Cavek-Queche-Vinak! nakipa-rumal mi-xe yutzcupih-vi La e Ah-Uxab, e Ah-Pokomam chi qui huyubal, chi qui tagahal? Ahcarroc cah, ahcarroc uleu! Xacuxere mi-xe c’ocoben canoc chi ka huyubal, chi ka tagahal tzaka nape apana La yebal La, ziqibal La chiquech e Ah-Uxab, e Ah-Pokomam. Hanpa-na-vi x-que cha uloc chiri-cut mi-x-tzak apana La yebal La, ziqibal La chiquech Ah-Uxab, Ah-Pokomam chiricut mi-x-qui tzak uloc qui yebal, qui ziqibal. «Yeha, yeha! yx, Ah-Uxab, yx, Ah-Pokomam, qu’yx tzeleh ana uloc y ta-na y pixabaxiquil varal, chuxmut cah, chuxmut uleu.»

Mi-x-chau apana La, chiri-cut mi-x-e cha uloc e Ah-Uxab, e Ah-Pokomam: «Yeha, yeha! oyeu achi, Cavek-Queche-Vinak! xerecuri mi-x-oh yutzcupitah uloc chi ka huyubal, chi ka tagahal. Manare varal koh etar-vi cuq v’al, cuq nu qahol, chila qol han-vi xe geka zutz, xe zaki zutz, chi machmal teu, chi machmal horon, xe u muhibal, xe u muhibal raxon, xe u ganal pek, u ganal cacou, xe gana-puvak, xe zaki-puvak, xe pich, xe qot, cuq v’al, cuq nu qahol. Are na ri v’al, are nu qahol: mana qo qaxcoquiric-vi huper chakap tzukubal que; xa e tzulic qo c’uloc huqal pek, hun qui qal cacou. Rumal e ahpich, e ahqot chuxe-gih, chuxe-zak. Are curi r’al u qahol u Galel-Achi Rabinal-Achi, xacu chi cakrail, chi cakqaxcol ca qui riq-vi huper chakap tzukubal que chuxe-gih, chuxe zak. Xavi xahun r’akan que tzuun, chirih, que tzuun chi qui vach: xa e xechexoh, xa e hetzehoh ri qui u vivih, ri qui u mamah u Galel-Achi Rabinal-Achi, chuxe-gih, chuxe-zak.» Mi-x-cha uloc qui yebal, qui ziqibal e Ah-Uxab, e Ah-Pokomam, rumal u cakobal qui qux….

… Mi-x-cha chicu apana La chiquech: «Yeha, yeha! yx, Ah-Uxab, yx, Ah-Pokomam. La ca cha na curi y tzih chuvach cah, chuvach uleu. Are na ri r’al u qahol oyeu achi Rabinal-Achi mana qo ch’oc chi qui vach chuvi qui zukunic qui cahalenic chi cahpa chi cah xucutal, chu holom uleu, chi r’akan uleu, pa hun varabal, pa cay varabal; rumal qo qui couil, qo c’achihilal. Are curi al qahol La, ri hal, xacu que mayixic, que utixic zukulic que chololic que balalic que el chi qui huyubal, chi qui tagahal: ca-rah-cu xahun, xa caib chic ca quiric qui tzakil, qui qoxtunal; rumal xa que mayixic, xa que utixic chuvi qui zukunic qui cahalenic…. Arecuri r’al, u qahol oyeu achi, Galel-Achi, Rabinal-Achi xa-cu-hun, xa-cu-caib chique elic ubic, xavi xaki xahun, xa caib chi quiric uloc qui tzakil, qui qoxtunal.» Mi-x-cha apana La chique Ah-Uxab, Ah-Pokomam….

… Mi-x-cha chi curi nu tzih: Yeha, yeha! oyeu achi, Cavek-Queche-Vinak! mi-x-ta bala ri qui yebal, qui ziqibal e Ah-Uxab, e Ah-Pokomam mi-x-qui tzak uloc. Ahcarroc cah, ahcarroc uleu! catz-cu-chi-tzih mi-x-e gaga-ben canah chuxmut cah, chuxmut uleu chi qui vi k’al, chi qui vi ka qahol. Catz-cu-chi-tzih ma x-echabe-na-tah chirech zakil huyu, zakil tagah; xaculo xacu-maih mi-x-ul qiza La u quïal gih, u quïalagab chuxmut cah, chuxmut uleu, xavi x-ul qiza La r’al chab La, r’al pocob La, xavi x-ul quiza La u vach chug, u vach teleb La. Mana qo x-opon-vi, catz-cu-chi-tzih ma-x-echaben-ta-cu La chuxmut cah, chuxmut uleu; etaam cu La qo-vi r’etal uleu La ch’ani-beh cula tzalah ubila r’akan huyu, r’akan tagah. Catz-cu-chi-tzih in oyeu achi, Galel-Achi Rabinal-Achi, qu’in etaric canoc cuq v’al, cuq nu qahol, varal chuxmut cah, chuxmut uleu. Qui cha curi nu tzih chuvach cah, chuvach uleu. Quehe cah, uleu chi qohe uq La, oyeu achi, Cavek-Queche-Vinak.

U VAKMUL CA CHAU
QUECHE-ACHI.

Eha, eha! ahcarroc cah, ahcarroc uleu! Na quitzih chi tzih mana x-in echaben-tah varal chuxmut cah, chuxmut uleu, chirech zakil huyu, chirech zakil tagah. La xalog, la xamaih mi-x-ul nu qiza u quïal gih, u quïal agab chiri chuxmut cah, chuxmut uleu? La mana qo x-opon-vi v’oyeualal, v’achihilal? Ahcarroc cah, ahcarroc uleu! h’in bala chi nu huyubal, chi nu tagahal. Mi-x-cha curi nu tzih chuvach cah, chuvach uleu. Mi-x-nu tzalah r’akan huyu, r’akan tagah, chilacut mi-x-in etaqamara-vi tzam Camba, ch’ucheexic. Cha curi nu tzih chuvach cah, chuvach uleu: La mana r’oquicam x-ch’in takih-ta ubi ahau Camba chirech nu xtapiyac, pa qui vi r’al, pa qui vi u qahol u Galel-Achi, Rabinal-Achi. Mi-x-cha u cokobal nu qux. Xacuxere ca-rah ca cokon cah, ca cokon uleu, cha curi nu tzih: x-in el chi-cu-chiri chilacut mi-x-in etaqamara-vi tzam Zaktihel huyu, Zaktihel tagah, mi-x-nu tzak nu yebal, nu ziqibal. Ahcarroc cah, ahcarroc uleu! La ca-tzih-chi-tzih mana x-in echaben-tah varal chuxmut cah, chuxmut uleu? Chiri-cut mi-x-i kah chi tzal ya, xecatere mi-x-nu-v’ilo r’uleual nabelic, xambelic, r’uleual gan-bozaki-hal, gana-tzuculic, zaki tzuculic, ca r’ixgag-tziquin….

… Cha cu nu tzih chuvach cah, chuvach uleu. La mana r’oquicam mi-x-ch’in loteh-ta ubi zcaquin veva r’uleual nabelic, xambelic chupam r’al nu chab, chupam r’al nu pocob…. Chiricut mi-x-nu mukteeh nu xtapiyac chupam r’uleual nabelic, xambelic: x-in el cu-chiri chilacut, mi-x-in etaqamara-vi tzam Xtincurun chuvach Ximbal-ha, ch’ucheexic. X-in el chi-cu-chiri chila-chicut, mi-x-in etaqamara-vi tzam Quezentun, ch’ucheexic, chila-cut mi-x-i tunan-vi, rumal u cokobal nu qux, oxlahu-vinak gih, oxlahu-vinak agab zak; rumal ma-x-in echaben-tah varal chuxmut cah, chuxmut uleu chirech zakil huyu, chirech zakil tagah. Cha curi nu tzih chuvach cah, chuvach uleu. Ahcarroc cah, ahcarroc uleu! La ca-tzih-chi-tzih ma-x-in echaben-tah varal chuxmut cah, chuxmut uleu, laxalog, laxamaih mi-x-ul nu qiza u quïal gih, u quïal agab! cha curi nu tzih chuvach cah, chuvach uleu. Xavi x-ul nu qiza vach nu chug, vach nu teleb; mana qo cu-x-opon-vi v’oyeualal, v’achihilal. X-cha curi nu tzih chuvach cah, chuvach uleu: H’in bala chi nu huyubal, chi nu tagahal. X-cha ri nu tzih chiricut mi-x-in tzalah ubi r’akan huyu, r’akan tagah, x-cha curi nu tzih. Quehe cah, uleu chi qohe uq La, o Galel-Achi, Rabinal-Achi!

U VUKMAL CA CHAU
RABINAL-ACHI.

Yeha! oyeu achi, Cavek Queche Vinak!…. «V’al nu qahol!… Nakipa-rumal x-e a yac ubic v’al nu qahol?… Mana qo av’oquibal chique … xa que a yutzcupih canoc chi qui huyubal, chi qui tagahal. Ve mavi x-que a yutzcupih canoc, ta ca-rah cah, ta ca-rah uleu, ca-n’ziloh cah, ca-n’ziloh uleu mi-x-cha nu yebal.» Rumal in hintah, qu’in tahinic in qohol r’etal uleu chila tzam Mucutzuum, ch’ucheexic, ta mi-x-yac bilam ri zakil al, zakil qahol, chupam r’al chab La, chupam r’al pocob La, chiri-cut mana xob qux La chirech u taic nu yebal, nu ziqibal. Chiri cut mi-x-in tzalah r’akan huyu, r’akan tagah chila-cut mi-x-in etaqamara-vi Pan-Ahachel, ch’ucheexic. Chila-cut mi-x-nu tzak-vi nu yebal, nu ziqibal chi ech La. Atarecu chiri mi-x-e yutzcopih can La ri zakil al, zakil qahol chiri chi Nimche chi Cabrakan Paraveno, ch’ucheexic. Xax zcaquin chic mana x-e yopihic Queche huyu, Queche tagah: chiri-cut mi-x-e tzeleh uloc qui mah uloc r’akan huyu, r’akan tagah tazec tzahtzat qui pam, ca xirxotileb u coc qui pam mi-x-e tzeleh uloc. Xacuxere mana x-e yopih chic chupam qui tzakil, chupam qui qoxtunal; xacu chiri chic mi-x-e amagelab-vi chiri Panamaka ch’ucheexic….

… Xavi qui Lal mi-x-ul elezah-la v’ahaual, nu vinakil chiri Ch’Atinibal, ch’ucheexic. Mapa x-vi in hintah, qu’in tahin in ucok in qohol r’etal uleu chila Tzam-ha, chuvach Qulavach-Abah ch’ucheexic. Xacutare mi-x-in tzak uloc nu tzubal, nu mucubal chuvach cah, chuvach uleu. Xa nim r’akanibal zutz, r’akanibal mayul hikhotinak chi canoc chuvach u nimal tzak, u nimal qoxtun chiri-cut mi-x-nu tzak uloc nu yebal, nu ziqibal chuvach cah, chuvach uleu. Cha curi nu tzih: «Yeha, yeha! oyeu achi, Cavek-Queche-Vinak!… v’ahaual, nu vinakil!… nakipa-rumal x-ul av’elezah chupam u nimal tzak, u nimal qoxtun? xa mana qo av’oquibal chire…. xa ch’a yutzcopih canoc chupam u nimal tzak u nimal qoxtun, cha curi nu tzih.» Xacuxere mana x-oc qux La chire u taic nu yebal, nu ziqibal. Cha curi nu tzih: «Uve mavi ch’a yutzcopih canoc v’ahaual, nu vinakil, ta ca-rah cah, ta ca-rah uleu! ca-n’ziloh cah, ca-n’ziloh uleu pa cah nu be, p’uleu nu be.» Cha curi nu tzih. Chiricut mana x-oc qux La chire u taic nu yebal, nu ciqibal. Mi-x-in tzalah ubi r’akan huyu, r’akan zak, u nimal tagah chila-cut mi-x-in etaqamara-vi chupam u nimal qoxtun. Xecutare mi-x-nu v’ilo xa r’akanibal zutz chic, r’akanibal mayul chic hikhotinak chic chuvach u nimal tzak, u nimal qoxtun: xa lol xa xil chic que tunan chi canoc, que xilil chi canoc chupam u nimal tzak, u nimal qoxtun. Chiri cut pah nu qux, c’ogotah nu qux, x-in tzalah chic ubi r’akan huyu, r’akan tagah chila-cut mi-x-i yopih apan-oc Queche-huyu, Queche tagah, qatare mi-x-nu riqo v’ahaual, nu vinakil, xa-nim tzakim chirih, tzakim chivach chupam akam-chun. Chiricut mi-x-nu tarih chirech r’al nu chab, r’al nu pocob, ruq nu yaquim vit, nu yaquim icah, ruq v’oyeualal, v’achihilal. Xacutare mi-x-nu v’ilo v’ahaual, nu vinakil, xa-nim loloxinak chirih u vach chupam akam-chun, chiricut mi-x-nu lototeh chupam r’al nu chab, r’al nu pocob. Catz-cu-chi-tzih veta ma in ma-hay, catz-cu-chi-la ca chay-vi vixal u cutamil v’ahaual, nu vinakil Queche huyu, Queche tagah. Arecuri rumal mi-x-in yac chu v’iloc chupam r’al nu chab, chupam r’al nu pocob, mi-x-ul nu hetizah-vi chicut chupam u tzakil, u qoxtunal ri v’ahaual, nu vinakil.

… Mapa mi-xe qiz La caib, oxib u gab-amag, zivan-tinamit chiri Balamvac, chi tintot-vi poklah, Chi-Calcaraxah, Chi-Cunu, Chi-Gozibal-Tagah-Tulul, ch’ucheexic? Hanicpa-cut mavi chi cou r’ahabal qux La, chi va oyeual, chirech va achihilal? Are-na-cu ch’ul tohonizah La ri varal chuxmut cah, chuxmut uleu. Queche x-tin yopizah tzihol La chupam u nimal tzak, u nimal qoxtun, chuvach v’ahaual, nu vinakil. Quehe cut mi-x-pixab-chi-ta can La chi huyubal La, chi tagahal La: rumal varal ca ka chay-vi vixal La, cutamil La, varal chuxmut cah, chuxmut uleu. Quehe curi catzih. Quehe mavi quïa tzih koh tzihonic uq La. Cah, uleu chi qohe uq La, Cavek-Queche-Vinak.

U VUKMUL CA CHAU
QUECHE-ACHI.

Yeha! oyeu achi, Rabinal-Achi! La ca cha na-curi tzih La chuvach cah, chuvach uleu. Catz are tzih mana qo x-u hal tzih mi-x-bixtah La chuvach cah, chuvach uleu, chi nu chi, chi nu vach. Catz-cu-chi-tzih in x-nu makubeh xe pixab-chi nabey k’ahaual, ka vinakil. «Mi-x-oh qui ch’ogo, mi-x-oh qui ziqih!» X-cha cu qui tzih k’ahaual, ka vinakil, Ahauh Tekentoh, Ahauh Teken-Tihax, Gumarmachi chi Taktazib, Taktazimah, Cuxumaah, Cuxuma-cho, Cuxuma-Zivan, Cuxuma-Tziquin, qui bi, qui chi, qui vach la k’ahaual, la ka vinakil: «Chi pe-ta na Alak cablahuh chi oyeu, chi achihab, ch’ul ta-tan Alak pixabaxiquil Alak, mi-x-cha nabey ri qui tzih chique uq La. Xacuxere rumal haaric, taamic, tuxaric, tzarahmaquiric u pam hun chi vabal, chi uqabal chupam u nimal tzak qoxtun, xa beleheb, xa lahuh chic ri zakil al, ri zakil qahol e qo chupam qui tzakil qui qoxtunal.» X-cha nabey ri qui tzih chique, uq La. Xacuxere rumal mana x-in echaben-tah varal chuxmut cah, chuxmut uleu: rumal cut u cokobal nu qux ta x-e nu benebeh, x-e nu tzelehebeh ri zakil al, ri zakil qahol chiri ucok que tzerucutiah-vi qui vach chupam iximche, chirech u zukuxic u chicopil gana cab, raxa cab. Mi-x-e nu-v’ilo, cha curi nu tzih chuvach cah, chuvach uleu: «La mana r’oquicam x-que nu yacat ubi va zakil al, va zakil qahol, que yacah-ta chi nu huyubal, ta chi nu tagahal?» Cha ri nu tzih: «ch’in v’oponibeh-tah chuvach v’ahaual nu vinakil Queche huyu, Queche tagah.» X-cha ri nu tzih: «Arecuri zcaquin r’uleual nabelic, xambelic, anboz-zaki-hal, gana tzuculic, zaki tzuculic!» Chiricut mi-x-in quirireh-vi canoc chiri Pan-Cakil, ch’ucheexic; rumal are x-bec nu qux cuq zakil al, zakil qahol….

… Xacuxere rumal mi-x-tzak apon La yebal La, ziqibal La: na nu qux, x-og nu qux chirech u taic yebal La, ziqibal La; xacutare mi-x-yopih apana La chupam Pan-Ahachel, chilacut mi-x-tzak-vi La yebal La, ziqibal La. Qatecu chiri mi-x-e nu yutzcopih uloc ri zakil al, ri zakil qahol chiri chi Nim-Che chi Cabrakan Pan-Araveno, ch’ucheexic. Xa x-zcaquin chi rah mana x-e yopihic ri zakil al, ri zakil qahol chi nu huyubal, chi nu tagahal Queche huyu, Queche tagah. Quehecut mi-x-e tzelehva-chin uloc ri zakil al, zakil qahol, ca xirxotileb u coc qui pam ca tzah-tzateleb u coc qui pam, qui mah uloc u vach r’akan huyu, r’akan tagah. Xacuxere rumal mana x-e yopitah uloc chupam qui tzakil qui qoxtunal: xacuchiri chic x-e amagelab-vi Panamaka, ch’ucheexic…. Xavi-catz in x-nu makubeh, mi-x-ul nu v’elezah ahaual La, vinakil La chiri Ch’Atinibal, ch’ucheexic; rumal xa c’atin ucok, chiri mi-x-in yac ubi pa r’al nu chab, pa r’al nu pocob; mi-x-in kazah-cut chi nu huyubal, chi nu tagahal Queche huyu, Queche tagah, rumal u cokobal nu qux, rumal ma x-in echaben-tah chuxmut cah, chuxmut uleu. Quehecut mi-x-in tzapih-cut chupam tzak chun-akam, mi-x-in tzahcabih rih, mi-x-in tzahcabih vach chupam chun-akam…. Catz-cu in x-in makubeh, xavi ca cha ri tzih La: «Mi-x-e qiz La caib, oxib u gab-amag, zivan-tinamit chiri Balamvac, chi tintot poklah, Chi-Calcaraxah, Chi-Cunu, chi Gozibal-Tagah-Tulul, ch’ucheexic.» Catz-cu in x-nu-makubeh rumal u cokobal nu qux, la arecu x-ch’ul nu tohorizah ri varal chuxmut cah, chuxmut uleu.

… Mana qo-va ch’u biih chi nu chi, chi nu vach; xa va cuc, xa va tziquin chi nu vach, la qo c’u xuban ri chi ech La, Lal ahau?… ma-pa xavi ca cha ri tzih La: «Ca-n’yopizah tzihoxic La chuvach v’ahaual, nu vinakil chupam u nimal tzak, u nimal qoxtun. Mi-x-pixab-chi-ta cu can La chi huyubal La, chi tagah La, rumal varal ca ka chay-vi vixal La, cutamil La varal chuxmut cah, chuxmut uleu.» Ca cha ri tzih La. La mana qo r’oquicam chi ka ban-tah utzil chaomal, atz in kib, chag in kib, ch’in vik-ta can La, x-ch’in cauuh-ta can La chirech nu gana-puvak, nu zaki-puvak, ruq r’al nu chab, ruq r’al nu pocob, nu yaquim vit, nu yaquim icah, ruq xquetak v’atziak, ruq nu xtapiak; varal-tah chi chakun-vi, chi patanin-vi chique al La, qahol La, varal chuxmut cah, chuxmut uleu, xata nima r’etalil quin yutzcopih-ta bi-La chi nu huyubal, chi nu tagahal. Ca cha curi ka tzih chuvach cah, chuvach uleu. Cah, uleu-ta chi qohe uq La, oyeu achi, Galel-Achi Rabinal-Achi!

U VAHXAKMUL CA CHAU
RABINAL-ACHI.

Yeha! oyeu achi, Cavek-Queche-Vinak! La ca cha na curi tzih La chuvach cah, chuvach uleu? «La mana r’oquicam x-ch’in cauuh-ta can La, ch’in vik-ta pu can La chirech nu gana-puvak, nu zaki-puvak, ruq r’al nu chab, ruq r’al nu pocob, ruq xquetak v’atziak, ruq nu xtapiak, varal-ta chi chakun-vi, chi patanin-vi chuxmut cah, chuxmut uleu, ca cha ri tzih-vi La….» La h’in ma x-qu’i cha-pa curi chuvach v’ahaual, chuvach nu vinakil taze-ba hun oyeu, taze-na hun achi mi-x-ka chugabeh kib ruq, chirih u nimal tzak, u nimal qoxtun, chi oxlahu-vinak gih, chi oxlahu-vinak agab, qo ka varam, ma-habi ka yacalem ruq; quehecut mi-x-nu vik canoc chirech u gana-puvak, chirech u zaki-puvak, ruq u yaquim vit, u yaquim icah, ruq xquetak r’atziak, ruq u xtapiak! La ma x-qu’i cha va chuvach v’ahaual, chuvach nu vinakil, quehecut mi-x-in yutzcopih ubi chu huyubal, chu tagahal! la-ma x-qu’i cha va chuvach v’ahaual, chuvach nu vinakil! Xavi in tzacat, in molah rumal v’ahaual, nu vinakil; qolic nu gana-puvak, nu zaki-puvak; xavi qolic r’al nu chab, r’al nu pocob ruq nu yaquim vit, nu yaquim icah; in tzacat in molah rumal v’ahaual, nu vinakil, chupam u nimal tzak, chupam u nimal qoxtun. Quehecut qu’in yopizah tzihol La chupam u nimal tzak qoxtun, chuvach v’ahaual, nu vinakil. Ve cu x-chi cha v’ahaual, nu vinakil yutzcopih ubi La chu huyubal, chu tagahal, uvech chi cha v’ahaual, xavi x-ch’in yutzcopih bi La. Xavi ve x-chi cha v’ahaual, nu vinakil: «Chi coh-ta na ulo La chi nu chi, chi nu vach, can v’il na u chi u vach hanicpa chi oyeu, chi achi.» Uve x-chi cha v’ahaual nu vinakil, quehecut ca-nu yopizah La. Ca cha curi nu tzih chuvach cah, chuvach uleu. Cah, uleu chi qohe uq La, oyeu achi, Cavek-Queche-Vinak!

U VAHXAKMUL CA CHAU
QUECHE-ACHI.

Eha! utz quehe qo bala! oyeu achi, Rabinal-Achi! ve ca yopizah La nu tzihoxic chuvach ahaual La, chupam u nimal tzak u nimal qoxtun, quin yopizah La. Quehe cah, uleu chi qohe uq La, Galel-Achi, o Rabinal-Achi!


« ||| »



Tagged as:

Comments are closed.